பெண்கள் சுதந்திரத்தை தவறாகப் பயன்படுத்தலாமா?

ஞானகுரு பதில்கள்

கேள்வி : பெண்களுக்கு அளிக்கப்படும் சுதந்திரத்தை தவறாக சிலர் பயன்படுத்துகிறார்களே..?

• கோ.அரங்கநாதன், செம்மணூர்.

ஞானகுரு :

பெண்ணுக்கு சுதந்திரம் கொடுக்கும் அதிகாரத்தை உங்களுக்கு யார் தந்தது..? பெண்ணுக்கு சுதந்திரம் அளிப்பதாக நினைப்பதும், பெண்ணை கட்டுப்படுத்த துடிப்பதும்தான் ஆண்மைத் திமிர்.

ஆணுக்கு இருக்கும் அத்தனை திமிரும், பொறுக்கித்தனமும் பெண்ணிடமும் உண்டு. சுய சுதந்திரத்தை பாதுகாத்து நடக்காத ஆணைப் போலவே பெண்ணும் மோசம் போகலாம். ஆனால், அது அவளுடைய விருப்பம்.

ஒரு ஆண் தவறு செய்தால், ஆண்களுக்கு சுதந்திரம் கொடுத்ததால் நேர்ந்த தவறு என்று யாரும் சொல்லமாட்டார்கள். ஆனால், ஒரு பெண் தவறு செய்தால் அதை எல்லா பெண்களுக்கும் பொதுவாகப் பொருத்துவது நியாயமில்லை. தன் வாழ்க்கையை தானே முடிவு செய்யும் உரிமை. இது பெண்களுக்கு மட்டும் அல்ல், ஆண்களுக்கும், எல்லோருக்கும் அடிப்படை மனித உரிமை. எந்த உரிமையும் போல, இதையும் சிலர் தவறாக பயன்படுத்தலாம். ஆனால் அதற்காக அந்த உரிமையை குற்றம் சொல்ல முடியாது.

கேள்வி : மன பலம், உடல் பலம் எது சிறந்தது?

• எஸ்.சரவணன், ராமநாதபுரம்.

ஞானகுரு :

யானைக்கு உடல் பலம் அதிகம். ஆனால் அந்த யானையை ஒரு சின்ன சங்கிலியில் கட்டிப் போடுவிடுகிறான் மனிதன். ஒரு சிறிய அங்குசத்தைக் காட்டி யானையை பிச்சை எடுக்க வைக்கிறான். மனதில் பலம் இல்லையென்றால் உடல் மட்டும் பலமாக இருந்து எந்த பிரயோஜனமும் இல்லை. பெரும்பாலான ரவுடிகள் சிக்ஸ் பேக் வைத்திருப்பதில்லை.