உழைப்பு இல்லாமல் எதுவும் இல்லை

மே 1 நினைவுகள்

உலகெங்கிலும் உள்ள பல்வேறு நாடுகளில் மே 1ம் நாள் உழைப்பாளர் தினமாக கொண்டாடப்பட்டு வருகிறது. உழைப்பாளர்கள் ஒன்று சேர்வதற்கு அடிக்கல் நாட்டியவர் காரல் மார்க்ஸ் எனலாம்.

உழைப்பு இல்லாமல் எந்த ஒரு பொருளும் உருவாகாது. ஆனால் தொழிலாளர்கள் ஐந்தறிவு ஜீவன்களை விட கீழ்த்தரமான நிலையில் நடத்தப்படும் நிலை இன்றும் தொடர்கிறது.

மனிதர்களை அடிமையாக நடத்துவது காலம் காலமாக தொடர்ந்துவந்த நிலை. கார்ல் மார்க்ஸ் புத்தகத்தின் அடிப்படையில் உலகம் முழுவதும் உரிமைக் குரல் எழுந்தது.

18 ஆம் நூற்றாண்டின் இறுதியில் வளர்ச்சியடைந்த நாடுகளில் தொழிலாளிகள் பலரும் நாளொன்றுக்கு 12 முதல் 18 மணி நேரக் கட்டாய வேலை செய்ய நிர்ப்பந்திக்கப்பட்டனர். இதற்கெதிரான குரல்களும் பல்வேறு நாடுகளில் ஆங்காங்கே எழத் துவங்கியது. இதில் குறிப்பிடத்தக்கது இங்கிலாந்தில் தோன்றிய சாசன இயக்கம்ஆகும்.

சாசன இயக்கம் 6 முக்கிய கோரிக்கைகளை முன்வைத்து தொடர் இயக்கங்களை நடத்தியது. அதில் குறிப்பிடத்தக்கது 10 மணி நேர வேலை கோரிக்கையாகும்.

இதே காலகட்டத்தில் ஆஸ்திரேலியாவில் மெல்பேர்னில் கட்டிடத் தொழிலில் ஈடுபட்டிருந்த தொழிலாளிகள் உலகிலேயே முதன் முதலாக 8 மணி நேர வேலை கோரிக்கையை முன்வைத்து 1856இல் வேலை நிறுத்தத்தில் ஈடுபட்டு, வெற்றியும் பெற்றனர். இது தொழிலாளி வர்க்கப் போராட்டத்தின் மைல் கல்லாக அமைந்தது.

அதனை தொடர்ந்து அமெரிக்காவில் உள்ள பல நிறுவனங்களிலும் உள்ள தொழிலாளர்கள் சுமார் 3,50,000 பேர் கலந்து கொண்டு போராட்டத்தை நடத்தினர். மெக்சிகோவில் 40,000 தொழிலாளர்களும், சிக்காகோவில் 70 ஆயிரத்திற்கும் மேற்பட்ட தொழிலாளர்களும் பங்கேற்றனர். இந்த போராட்டம் அமெரிக்காவை உலுக்கியது என்றே சொல்லலாம். இந்த போராட்டம் முதலில் அமைதியான முறையில் தான் நடைபெற்றது, ஆனால் இதில் பல தொழிலாளர்கள் கடுமையான தாக்குதலுக்கு உட்பட்டு, கொல்லப்பட்டனர்.

ஹேமார்க்கெட்

தொழிலாளர்களின் உரிமை மீறல்கள், நீண்ட வேலை நேரம், மோசமான வேலை நிலைமைகள், குறைந்த ஊதியம் மற்றும் குழந்தைத் தொழிலாளர்களுக்கு எதிராக ஹேமார்க்கெட் பகுதியில் ஆர்ப்பாட்டம் நடத்தப்பட்டது. மே 4, 1886 அன்று காவல்துறைக்கும், தொழிலாளர் எதிர்ப்பாளர்களுக்கும் இடையே வன்முறை மோதல் வெடித்தது. இதில், சிகாகோவில் உள்ள ஹேமார்க்கெட் சதுக்கத்தில் அமைதிப் பேரணியின் போது வெடிகுண்டு வெடித்ததன் அடிப்படையில், பேரணியை தடுக்க காவல் துறையினர் வந்தனர். இதில், வன்முறை வெடித்தது. உயிர் பலி ஏற்பட்டது.

இதில் பங்கெடுத்தவர்கள் “ஹேமார்க்கெட் தியாகிகள்” (Haymarket Martyrs) என்று அழைக்கப்பட்டனர். இந்த நிகழ்வு உலகெங்கிலும் உள்ள தொழிலாளர்கள் மீது பெரிய தாக்கத்தை ஏற்படுத்தியது மற்றும் உலகம் முழுவதும் சிறந்த வேலை நிலைமைகளுக்கான கோரிக்கைகளை முன்வைக்க உதவியது.

முதல் அங்கீகாரம்

1894 இல் தொழிலாளர் தினத்தை ஒரு கூட்டாட்சி விடுமுறையாக அமெரிக்கா முறையாக அங்கீகரித்ததுடன், இது ஒவ்வொரு ஆண்டும் செப்டம்பர் முதல் திங்கட்கிழமை கொண்டாடப்படுகிறது. இதன் தொடர்ச்சியாக விரைவில், கனடாவும் இதைப் பின்பற்றியது. இருப்பினும், எட்டு மணி நேர வேலை நாட்களை அங்கீகரிக்க அமெரிக்காவிற்கு மேலும் 22 ஆண்டுகள் மற்றும் பல போராட்டங்கள் தேவைப்பட்டன.

அமெரிக்காவும் கனடாவும் செப்டம்பர் முதல் திங்கட்கிழமை தொழிலாளர் தினத்தைக் கொண்டாடியபோது, மற்றவர்கள் வேறு தேதியைத் தேர்ந்தெடுத்தனர். 1889 ஆம் ஆண்டில், தி செகண்ட் இன்டர்நேஷனல் என்ற குழு மே 1 ஆம் தேதி சர்வதேச தொழிலாளர் தினமாக (International Workers’ Day) இருக்கும் என்று கூறியது.

மே 1 உருவானது

1889 ஆம் ஆண்டில், ஐந்தாண்டுகளுக்குப் பிறகு, ஆம்ஸ்டர்டாமில் உள்ள சர்வதேச சோசலிஸ்ட் காங்கிரஸ், மே 1 அன்று 8 மணி நேர வேலை, தொழிலாளர் உரிமைகள் மற்றும் உலகளாவிய அமைதிக்கு வலுவாக ஆதரவளிக்குமாறு உலகெங்கிலும் உள்ள அனைத்து சமூக ஜனநாயகக் கட்சி குழுக்களையும் தொழிற்சங்கங்களையும் வலியுறுத்தியது. அனைத்து நாடுகளிலும் உள்ள தொழிலாளர் அமைப்புகள் மே 1 அன்று தொழிலாளர்களுக்கு பாதிப்பு  ஏற்படாமல் எங்கு முடியுமோ அங்கெல்லாம் வேலைநிறுத்தம் செய்ய வேண்டும்.

1917 இல் ரஷ்யப் புரட்சிக்குப் Russian Revolution) பிறகு, சர்வதேச தொழிலாளர் தினம் சோவியத் ஒன்றியம் மற்றும் கிழக்கு முகாம் நாடுகளால் ஏற்றுக்கொள்ளப்பட்டு, தேசிய விடுமுறையாக மாறியது. மாஸ்கோவின் செஞ்சதுக்கத்தில் நடந்ததைப் போன்ற அணிவகுப்புகள், இராணுவ வலிமையை வெளிப்படுத்தின மற்றும் உயர்மட்ட கம்யூனிஸ்ட் தலைவர்கள் கலந்து கொண்டனர்.

தோழர் சிங்காரவேலர்

இந்தியாவில், மே தினம் முதன்முதலில் மே 1, 1923 அன்று, ஹிந்துஸ்தானின் லேபர் கிசான் கட்சி தொடங்கப்பட்ட பிறகு, தோழர் சிங்காரவேலர் மே தின கொண்டாட்டங்களுக்கு தலைமை தாங்கினார். சுயமரியாதை இயக்கத்தில் ஒரு தலைவராகவும் மற்றும் சென்னை மாகாணத்தில் பிற்படுத்தப்பட்ட வகுப்பினரின் உரிமைகளுக்காக போராடினார். திருவல்லிக்கேணி கடற்கரையிலும் சென்னை உயர்நீதிமன்றத்திற்கு எதிரே உள்ள கடற்கரையிலும் நடந்த இரண்டு கூட்டங்களில் தோழர் சிங்காரவேலர் ஒரு தீர்மானத்தை நிறைவேற்றினார். தொழிலாளர் தினத்தன்று அனைவருக்கும் அரசு தேசிய விடுமுறை அளிக்க வேண்டும் என்று தீர்மானம் நிறைவேற்றப்பட்டது.

உடல் உழைப்புக்கு மரியாதை தரும் நாள். தொழிலாளர்கள் இல்லை என்றால் சொகுசு வாழ்க்கை இல்லை என்பதை புரிந்துகொள்ள வேண்டும்.