கல்லும் இசை பாடும் தெரியுமா?

தமிழரின் அற்புதத் திறமை

நாட்டில் ஏகப்பட்ட இசைக் கருவிகள் இருக்கின்றன. கீபோர்டு, கிட்டார், வயலின், கடம், தவில் என்று சொல்லிக்கொண்டே போகலாம்.

பெரும்பாலான இசைக்கருவிகள் மரம், தோல், கம்பிகளால் செய்யப்பட்டவை. ஆனால், தமிழ்நாட்டில் கல்லில் செய்யப்பட்ட இசைக்கருவிகள் இருக்கின்றன தெரியுமா..?

ஆம், கல்லையும் இசைக் கருவியாக மாற்றியதுதான் தமிழனின் இசை சாதனை.  கல்லில் இசை எழுப்பும் தூண்கள் நிறுவியது நமது முன்னோர்களின் அசாத்தியத் திறமை என்றுதான் சொல்லவேண்டும்.

ஒவ்வொரு தூணை தட்டும்போதும், அவை வெவ்வேறு ஒலியில்இசைக்கின்றன. இது தவிர அதையொட்டியுள்ள சிறிய தூண்களும் பல ராகங்களை இசைக்கின்றன. மிருதங்கம், கடம், சலங்கை, வீணை, மணி போன்ற இசைக் கருவிகளின் இசையையும் இந்தத் தூண்களில் இருந்து பெறமுடியும்.

இதுபோன்ற இசைத் தூண்கள் மதுரை மீனாட்சியம்மன் கோயில், நெல்லையப்பர் கோயில், சுசீந்திரம் கோயில், ஆழ்வார் திருநகரி பெருமாள் கோயில் போன்ற இடங்களில் காணமுடிகிறது. 

இந்த இசைத் தூண்கள் ஒரே பெரிய கல்லில் இருந்து உருவாக்கப்பட்டவை. சிற்பிகள் அந்தக் கல்லை மிகுந்த நுணுக்கத்துடன் வெட்டி, அதிலிருந்து பல மெலிந்த துணைத் தூண்களை உருவாக்கியுள்ளனர். இந்த துணைத் தூண்களை மெதுவாக தட்டினால், வெவ்வேறு ஸ்வரங்களில் ஒலி எழுகிறது. இது கல்லின் அடர்த்தி, நீளம், அகலம் போன்ற அம்சங்களை சரியாக கணித்து வடிவமைக்கப்பட்டதன் விளைவாகும்.

ஒவ்வொரு தூணும் ஒரு இசைக்கருவி போல செயல்படுகிறது. சில தூண்கள் தவில் போன்ற ஒலி கொடுக்க, சில தூண்கள் வீணை அல்லது மணி ஒலி போன்ற சத்தங்களை உருவாக்குகின்றன. இது ஒலி அதிர்வியல் எனப்படும் வைப்ரேஷன் மற்றும் அதிர்வெண் எனப்படும் ஃபிரீக்குவன்ஸி என்ற அறிவியல் கோட்பாடுகளின் அடிப்படையில் அமைந்துள்ளது. கல்லின் வடிவம் மற்றும் அளவு மாறுபட்டால், அதிர்வெண் மாறி, அதனால் ஒலியும் மாறுகிறது.

இந்த தூண்களை உருவாக்கிய சிற்பிகளின் திறமை மிகவும் வியப்பூட்டுகிறது. அந்தக் காலத்தில் நவீன கருவிகள் இல்லாமல், கணக்கீடுகள் மற்றும் அனுபவத்தின் மூலம் இத்தகைய அதிசயங்களை உருவாக்கியுள்ளனர். இவை கலை, அறிவியல் மற்றும் ஆன்மிகம் ஆகிய மூன்றின் சங்கமமாகும்.

மொத்தத்தில், இசைத் தூண்கள் தமிழகத்தின் பாரம்பரியத்தின் பெருமையை எடுத்துக்காட்டும் ஒரு சிறந்த சான்று.