மந்திரச்சொல்
மனிதர்கள் இயல்பாகவே தங்களை மற்றவர்களுடன் ஒப்பிட்டுப் பார்க்கிறார்கள். இந்த ஒப்பீடு சில நேரங்களில் முன்னேறுவதற்கான உந்துதலைத் தரலாம். ஆனால், தொடர்ந்து மற்றவர்களுடன் ஒப்பிட்டுக்கொள்வது தாழ்வு மனப்பான்மை, பொறாமை, மன அழுத்தம், அதிருப்தி ஆகியவற்றை உருவாக்கலாம்.
உங்களைவிடக் குறைவான இலக்குகளைக் கொண்டவர்களுடன் போட்டியிட்டு வெற்றி பெறுவது உண்மையான வளர்ச்சியல்ல. உங்களுடைய திறனை மேம்படுத்திக்கொள்வதுதான் உண்மையான வளர்ச்சி. நேற்று இருந்த உங்களை விட இன்று சிறந்தவராக இருக்கிறீர்களா? அதுதான் முக்கியமான கேள்வி.
ஒரு பெரிய மரமும், சிறிய புல்லும் ஒரே மண்ணில்தான் வளர்கின்றன. இரண்டுக்கும் கிடைப்பது ஒரே சூரிய ஒளி, ஒரே மழை, ஒரே காற்று. ஆனால் அவற்றின் வளர்ச்சி ஒன்றல்ல. மரம் ஒருபோதும் புல்லைப் பார்த்துப் பொறாமைப்படுவதில்லை. புல்லைவிட வேகமாக வளர வேண்டும் என்று பதற்றப்படுவதுமில்லை. ஏனென்றால், அது தனது இயல்பையும் இலக்கையும் அறிந்திருக்கிறது.
மனித வாழ்க்கையும் இப்படித்தான். பெரிய இலக்கை நோக்கிப் பயணிக்க விரும்பினால், உங்களுடைய நேரத்தையும் ஆற்றலையும் சிறிய விஷயங்களுக்காகச் செலவிடாதீர்கள். மற்றவர்கள் எவ்வளவு சம்பாதிக்கிறார்கள், எப்படிப் புகழ் பெறுகிறார்கள், எவ்வளவு வேகமாக முன்னேறுகிறார்கள் என்று ஒப்பிட்டுக்கொண்டே இருந்தால், உங்கள் தனித்துவமான வளர்ச்சிக்கான நேரம் வீணாகிவிடும்.
பெரிய வளர்ச்சிக்கு ஆழமான வேர்கள் தேவை. ஒரு மரத்தின் உயரத்தைப் பார்த்து நாம் வியக்கிறோம். ஆனால், அது மண்ணுக்குள் எவ்வளவு ஆழமாக வேர்களைப் பதித்திருக்கிறது என்பதைப் பார்ப்பதில்லை. விரைவாகப் புகழ் பெறுவது முக்கியமல்ல; நீண்ட காலம் மதிக்கப்படும் அளவுக்கு உங்களை வளர்த்துக்கொள்வதே முக்கியம்.
இந்தியத் தொழில்துறையில் மிகப்பெரிய அடையாளத்தை உருவாக்கியவர் ரத்தன் டாடா. 1991-ஆம் ஆண்டு டாடா குழுமத்தின் தலைவராகப் பொறுப்பேற்றபோது, ஏற்கெனவே பல நிறுவனங்களைக் கொண்டிருந்த அந்தக் குழுமத்தை நவீன உலகப் போட்டிக்குத் தயார்படுத்த வேண்டியிருந்தது. பழைய வெற்றிகளிலேயே திருப்தியடையாமல், உலகளாவிய வளர்ச்சியை நோக்கி நிறுவனத்தை நகர்த்தினார்.
டெட்லி, கோரஸ், ஜாகுவார் லேண்ட் ரோவர் போன்ற நிறுவனங்களைக் கையகப்படுத்தியதன் மூலம் இந்திய நிறுவனங்களும் உலக அரங்கில் பெரிய அளவில் போட்டியிட முடியும் என்பதை நிரூபித்தார்.
அவர் ஒவ்வொரு நாளும் மற்ற நிறுவனங்களைப் பார்த்துப் பொறாமைப்படவில்லை. மாறாக, டாடா குழுமம் அடுத்த தலைமுறைக்கு எப்படிப்பட்ட அடையாளத்தை விட்டுச் செல்ல வேண்டும் என்பதில் கவனம் செலுத்தினார். அதுதான் ஒரு பெரிய மரமாக வளர விரும்புபவரின் மனநிலை.
மற்றவர் வேகமாக வளர்கிறார் என்பதற்காக அவசரப்படாதீர்கள். புல்லாக வளர விரும்புபவர்கள் மற்றவர்களை முந்துவதற்காக ஓடிக்கொண்டிருக்கலாம். ஆனால், மரமாக வளர விரும்புபவர்கள் தங்கள் வேர்களை வலுப்படுத்திக்கொண்டிருப்பார்கள்.
பெரிய மனிதராக விரும்பினால், சிறிய போட்டிகளில் உங்கள் வாழ்க்கையைத் தொலைத்துவிடாதீர்கள். உயரமான இலக்கைத் தேர்ந்தெடுங்கள்; ஆழமான உழைப்பைத் தொடருங்கள்; உங்கள் வளர்ச்சியை நீங்களே தீர்மானியுங்கள்.
- எஸ்.கே.முருகன், மனவள ஆலோசகர்
