என்ன செய்தார் சைதை துரைசாமி – அத்தியாயம் 69
அம்மா உணவகம் முழுக்க முழுக்க அரசு நிறுவனம் என்றாலும், ஏழை எளிய மக்களுக்குப் பயன்படும் வகையில் தனியார் நிறுவனங்கள் மற்றும் வசதி படைத்த செல்வந்தர்களையும் இணைத்து லாபகரமாக நடத்துவதற்கு மேயர் சைதை துரைசாமி ஒரு திட்டம் தீட்டியிருந்தார்.
அதன்படி, வசதி படைத்தவர்கள் குடும்ப நபர்களின் பிறந்த நாள், மணநாள், மணிவிழா போன்ற விசேஷ தினங்களில், அம்மா உணவகத்தில் ஒரு நாள் செலவு அல்லது ஒரு நேர செலவு போன்றவற்றை அவர்கள் ஏற்றுக்கொள்ள வேண்டும். ஒரு நாள் அல்லது ஒரு நேரச் செலவுக்கான முழு தொகையையும் செல்வந்தர்களிடம் பெற்றுக்கொண்டு, அதற்கு பிரதியுபகாரமாக, அந்த ஸ்பான்சரின் பெயர் மற்றும் புகைப்படம் வைப்பதற்கு போர்டு வைக்கப்படும்.
பெருநகரச் சென்னையில் சுமார் 15,000 பேரை இந்த திட்டத்திற்குத் தேர்வு செய்தாலே போதும். சுழற்சி முறையில் அவர்களை ஸ்பான்சர்களாக மாற்றி அம்மா உணவகத்தை வெற்றிகரமாக நடத்தமுடியும் என்று சைதை துரைசாமி திட்டமிட்டார்.
தொழிலதிபர்கள், சினிமா கலைஞர்கள், பெரிய ஹோட்டல் முதலாளிகள், திருமண மண்டப உரிமையாளர்கள், கார்ப்பரேட் நிறுவனங்கள், தனியார் நிறுவனத்தின் உயர் அதிகாரிகள் என ஏராளமான நபர்களை எளிதில் இந்தத் திட்டத்தில் இணைத்து வெற்றிகரமாக நடத்த முடியும் என்று நம்பினார் மேயர் சைதை துரைசாமி.
இதுகுறித்து ஒருசிலரிடம் சைதை துரைசாமி பேசியபோது, அத்தனை பேருமே இந்த திட்டத்தில் பங்கெடுப்பதற்கு நிறையவே ஆர்வம் காட்டினார்கள். ஏனென்றால், அவர்களுக்கு அம்மா உணவகத்தின் ஒரு நாள் செலவு என்பது ஒரு சாதாரண செலவினம் மட்டுமே. அதேநேரம், ஏராளமான ஏழை, எளியவர்கள் சாப்பிடுவார்கள், மனதார வாழ்த்துவார்கள் என்று ஆர்வம் காட்டினார்கள்.
- நாளை பார்க்கலாம்.
