ஞானகுரு :
நமது ரத்தத்திலே கூட்டத்தின் குற்றம் ஒளிந்திருக்கிறது. தனி நபராக திருடுவதை பெரும் குற்றம் என்ற எண்ணத்தில் இருப்பார். அதே நபர், ஒரு சூப்பர் மார்க்கெட்டை ஒரு கும்பல் சூறையாடுவதையும் பலரும் அங்கிருக்கும் பொருட்களை அள்ளிக்கொண்டு செல்வதையும் பார்த்தால், உடனே உள்ளே நுழைந்து சில பொருட்களை எடுத்துக்கொள்வார். அதை பெருமையாகவும் சொல்வார். இது தான் கும்பல் புத்தி.
இந்த விஷயம் ஏற்கெனவே நீங்கள் கேள்விப்பட்டிருக்கலாம். அதாவது அருகருகே இரண்டு ரயில் தண்டவாளங்கள் இருக்கின்றன. ஒன்று கைவிடப்பட்டது என்பதால் அதில் ரயில் வருவதில்லை. அந்த தண்டவாளத்தில் ஒரு குழந்தை விளையாடிக்கொண்டு இருக்கிறது.
அருகே எப்போதும் ரயில் செல்லும் டிராக் இருக்கிறது. அந்த தண்டவாளத்தில் 10 பிள்ளைகள் விளையாடிக்கொண்டு இருக்கிறார்கள். அப்போது ரயில் வருகிறது.
உங்கள் கையில் ட்ராக் மாற்றும் கருவி இருக்கிறது என்றால் யாரை காப்பாற்றுவீர்கள் என்று ஒரு கேள்வி 50 நபர்களிடம் கேட்கப்பட்டது.
அத்தனை பேரும் சொன்ன பதில், ஒரு குழந்தை விளையாடிய டிராக்கிற்கு ரயிலை மாற்றுவேன் என்பது தான். அதனால் 10 குழந்தைகள் காப்பாற்றப்படும் என்றார்கள்.
அதாவது, தவறு செய்யாத ஒரு குழந்தையைக் கொல்லலாம். தவறு செய்தாலும் கூட்டமாக இருப்பதால் அந்த கும்பலைக் காப்பாற்றலாம் என்பதே அவர்கள் கூறிய நியாயம். அதனால் தான் ஒட்டுமொத்த கும்பலாகச் சென்று பாபர் மசூதியை உடைத்தவர்கள் கைது செய்யப்படுவதில்லை. ஒட்டுமொத்தமாகச் சென்று ரயிலுக்குத் தீ வைப்பவர்கள் தப்பிக்கிறார்கள். கூட்டமாக இருக்கும் முட்டாள்களை ஒருபோதும் குறைத்து எடை போடாதீர்கள்.