நெஞ்சை உலுக்கும் கவிதைகள்

கவித்துவம்

சில கவிதைகள் நெஞ்சை உலுக்கிவிடும், மீண்டும் மீண்டும் இம்சை செய்யும். அப்படிப்பட்ட சில கவிதைகள் இங்கே…

இம்புட்டுத்தான்…

ஒரு கனி

ஒரு இலை

உதிர்ந்தன பழுத்து.

மண்ணோடு கலந்த வழியில்

ஒன்று மரம்

ஒன்று உரம்

•  ராஜ சுந்தரராஜன்

சுயநலமி

வீட்டுக்குள் வராத அளவிற்குப்

பெய்யும் வரை தான்

மழைமேல் காதல்,

ரசனை,

சூடாக டீ,

காப்பி, வெங்காய பஜ்ஜி,

இளையராஜா பாடல் எல்லாமே.

• பிரபாகரன் சேரவஞ்சி

சமம்

குடித்துவிட்டு

பாட்டில்களை

வீசி எறிபவனுக்கும்

வாழ்க்கையிருக்கிறது.

எறியப்பட்ட

பாட்டில்களைப் பொறுக்குபவனுக்கும்

வாழ்க்கையிருக்கிறது..

இப்பூமியில்…!!

•  சௌவி

கேளுங்கள்

ஒன்றுமில்லை…

கைப் பிடித்து கண்ணீர் மல்கினார்

அந்தப் பெரியவர்,

நான் எந்தப் பேருதவியும்

செய்துவிடவில்லை அவருக்கு.

சற்று அவர் பேசுவதைக்

கேட்டுக்கொண்டிருந்தேன்.

 – ரமணி முருகேஷ்

இயல்பு

அன்பை மட்டும்

வெளிக்காட்டத் தெரிந்திருந்தால்

ஆண்கள்

கடவுளுக்கும் மேலாக

கொண்டாடப் பட்டிருப்பார்கள்

• ஆதிவா