மகிழ்ச்சி தரும் பாரம்பரிய விளையாட்டு
ஒற்றைக் காலை பயன்படுத்தி கண்களை மறைத்துக் கொண்டு ஒவ்வொரு கட்டமாக குதித்து வெளியே வரும் விளையாட்டை சின்ன வயதில் பலரும் விளையாடி இருக்கலாம். ஒவ்வொரு குதிப்புக்கும் சரியா சரியா என்று கேள்வி எழுப்பிக் கொண்டே குதிக்கவேண்டும். சுற்றி இருப்பவர்கள் சரி சரி என்று சொல்லவேண்டும். கோட்டின் மீது கால் பட்டாலும் வெளியே குதித்து விட்டாலும் தவறு என்று குரல் எழுப்புவர். அப்பொழுது கண் விழித்து பார்க்க வேண்டும் . ஆட்டத்தை விட்டு வெளியேறி விட வேண்டும். இது சரியா தவறா ஆட்டம் என்று கூறப்படுவதுண்டு. கண்களை மூடாமலும் இந்த விளையாட்டு நடப்பதுண்டு.
நம் முன்னோர்கள் இப்படிப்பட்ட பாரம்பரிய விளையாட்டுகள் மூலம்தான், குழந்தைகளுக்கு நல்ல ஆரோக்கியத்தையும் சந்தோஷத்தையும் வழங்கி வந்தனர். பாரம்பரிய விளையாட்டுகளில் ஒன்றுதான் எட்டுக்கோடு.
இது, பல்வேறு இடங்களில் பல்வேறு பெயர்களில் (சில்லுக்கோடு, சில்லு விளையாட்டு) அழைக்கப்படுகிறது. நொண்டி விளையாட்டின் ஒரு பிரிவே இத்தகைய விளையாட்டு. இது, பெரும்பாலும் சிறுவர்களால் விளையாடப்படுகிறது, அதிலும் குறிப்பாக, சிறுமிகளே அதிகம் விளையாடுவர். இது வீட்டுக்கு வெளியில் விளையாடப்படுவதாயினும், இடவசதி இருந்தால் உள்ளேயும் விளையாடலாம். இந்த விளையாட்டை விளையாடுபவர்களுடைய எண்ணிக்கைக்கு வரையறை இல்லை. பங்கேற்பவர்கள் ஒவ்வொருவரும் தனித்தனிப் போட்டியாளராகவே பங்குபெறுவது வழக்கம். இந்த சில்லுக்கோட்டில் பல பிரிவுகள் உள்ளன. ஒவ்வொரு பிரிவையும் வென்று அதிகம் பழம் கட்டுபவரே வெற்றிபெற்றவர் ஆவார்.
இதை விளையாடுவதற்கான களத்தில் 8 கட்டங்கள் அமையக்கூடியவாறு கோடுகள் வரையப்பட்டிருக்கும். கட்டங்களின் அளவு ஒருகட்டத்திலிருந்து இன்னொரு கட்டத்துக்குக் பாய்வதற்கு ஏற்றார்போல் இருக்க வேண்டும். எட்டுச் சதுரங்கள் கொண்ட இப்பெட்டியில் இடதுபக்கம் நான்கு பெட்டிகளும், வலதுபக்கம் நான்கு பெட்டிகளும் இருக்கும். விளையாட்டை இடதுபக்கம் இருந்தே தொடங்க வேண்டும். இடது பக்கமாகப் போகும்போது ஐந்தாவது பெட்டி அதாவது, வலதுபக்கத்தின் மேற்பெட்டி வீடு. இங்கு காலாறி ஓய்வெடுக்கலாம்.
சிப்பியை (பானை ஓடு – சில்லு) இடதுபக்க முதற்பெட்டியில் போட வேண்டும். போடும்போது, சிப்பி கண்டிப்பாகப் பெட்டிக்குள் விழவேண்டும். கோடுகளில் வீழ்ந்துவிடக் கூடாது. ஒற்றைக்காலால் கெந்தி, அந்தச் சிப்பியை மிதிக்க வேண்டும். ஒரு கெந்தலிலேயே மிதித்துவிட வேண்டும். மிதித்த சிப்பியை குனிந்து கையால் எடுத்துக்கொண்டு இரண்டாவது, மூன்றாவது, நான்காவது பெட்டிகளுக்குள் கெந்தி ஐந்தாவது பெட்டிக்குள் இரண்டு கால்களையும் வைத்து நின்றுவிட்டு மீண்டும் ஆறாவது, ஏழாவது, எட்டாவது பெட்டிகளுக்குள் கெந்தி வெளியில் போக வேண்டும். இதே முறையில் இரண்டாவது, மூன்றாவது, நான்காவது, ஆறாவது, ஏழாவது, எட்டாவது பெட்டிகளுக்குள் சிப்பியைப் போட்டு இதே ஒழுங்கில் சென்று மிதித்து, எடுத்துக்கொண்டு வெளியில் போக வேண்டும். ஆறாவது, ஏழாவது, எட்டாவது பெட்டிகளுக்குள் சிப்பியைப் போடும்போது இடதுபக்க மூலையில் நின்றே போடவேண்டும்.
எட்டுப் பெட்டிகளும் விளையாடி முடித்தபிறகு, சிப்பியை முதலில் போலவே போட்டு, ஒற்றைக்காலால் கெந்தி மிதிக்க வேண்டும். ஒரு கெந்தலிலேயே மிதித்துவிட வேண்டும். மிதித்த சிப்பியை குனிந்து கையால் எடுத்து, தூக்கி வைத்திருக்கும் கால் பாதத்தில் விரல்களின் மேல் வைத்துக்கொண்டு கெந்த வேண்டும். கெந்தும்போது சிப்பி கீழே வீழ்ந்துவிடக் கூடாது. எட்டாவது பெட்டிக்கு வந்ததும் சிப்பியை பெட்டிக்கு வெளியில் போட்டுவிட்டு கெந்தி அதை மிதிக்க வேண்டும். அடுத்து, சிப்பியை தலையில் வைத்துக்கொண்டு கண்களை மூடிக்கொண்டு பெட்டிகளில் நடக்க வேண்டும். ஒற்றைக்கால் முதற்பெட்டியிலும் மற்றொரு கால் இரண்டாவது பெட்டியிலும் என்று வைத்து நடக்க வேண்டும். முகம் மெதுவாக மேலே தூக்கப்பட்டிருக்க வேண்டும்.
நடக்கும்போது ‘சரியா? சரியா?’ என்று கேட்க வேண்டும். கால் விரல்கள் கோடுகளில் பட்டுவிடக் கூடாது. பட்டுவிட்டால் பிழை என்பார்கள். 5வது பெட்டியில் இரண்டு கால்களையும் வைத்து நின்று கண்களைத் திறந்து பார்த்துவிட்டு மீண்டும் ஆறாவது ஏழாவது பெட்டிகளைக் கடந்து எட்டாவது பெட்டிக்கு வந்ததும் தலையில் உள்ள சிப்பியை கண்களை மூடியபடி நின்று வெளியில் வீழ்த்திவிட்டு கண்களைத் திறக்க வேண்டும். பின் கெந்தி மிதிக்க வேண்டும். சரியாகச் சிப்பியில் மிதித்துவிட்டால், சிப்பியை கையில் எடுத்து எட்டுக்கோட்டுக்கு புறமுதுகு காட்டி நின்றுகொண்டு, சிப்பியை தலைக்கு மேலால் எட்டுக்கோட்டுக்குள் எறிய வேண்டும்.
சிப்பி கோடுகளிலோ, வெளியிலோ, ஐந்தாவது பெட்டிக்குள்ளோ விழக் கூடாது.
மூன்று சந்தர்ப்பங்களில் சிப்பி எந்தப் பெட்டிக்குள் விழுகிறதோ, அந்தப் பெட்டி வெற்றியாளருக்குச் சொந்தமாகும். அதுவே பழம். வெற்றியாளர், அதற்குள் காலாறிப் போகலாம். மற்றவர்கள் அதைக் கடந்துதான் போக வேண்டும். அவர்கள் அதற்குள் கால்வைக்க முடியாது. இதேபோல் அடுத்த பழம் கட்ட, மீண்டும் முதலிலிருந்து விளையாட வேண்டும். இரண்டு பேருக்கு அடுத்தடுத்த பெட்டிகளில் பழம் வந்துவிட்டால் மற்றவர்கள் எப்படியாவது பாய்ந்து இரண்டு பெட்டிகளையும் கடக்க வேண்டும். யார் அதிக பழங்கள் எடுக்கிறாரோ, அவர் வென்றவர் ஆகிறார்.
சிறுமிகளிடம் விறுவிறுப்பு கூட்டும் இந்த விளையாட்டு, பார்ப்பவர்களுக்கும் விருந்து படைக்கும். இந்த சில்லு விளையாட்டு விளையாடுவதன் மூலம் குழந்தைகளின் ரத்த ஓட்டம் அதிகரிக்கும்; மனம் புத்துணர்வும் அடையும். நீளம் தாண்டுதலுக்கு ஒரு பயிற்சியாக இருக்கும். கண்களை மூடிக்கொண்டு நொண்டி செல்வதால், சிந்தனைத் திறனும் வளரும். மேலும், குழந்தைகள் யாவரும் மகிழ்வோடு விளையாடும்போது, அவர்களின் உடலும் மனமும் இலகுவாகி, உடலின் ஆற்றல் மேம்படுகிறது. சோம்பல் நீங்கி, சுறுசுறுப்பு உண்டாகிறது.
பாரம்பரிய விளையாட்டை ஊக்குவிப்போம்; குழந்தைகளின் ஆரோக்கியத்தைப் பேணிக் காப்போம்.
