ஆரோக்கிய டிப்ஸ்
காலையில் எழுந்ததும் நீராகாரம் குடித்த தமிழர்களை காபிக்கும் டீக்கும் அடிமையாக்கிய பெருமை வெள்ளையர்களையே சேரும். இன்றைய கொரோனா காலத்தில் மக்களுக்கு மீண்டும் பழைமை மீது நம்பிக்கை வந்துவிட்டது. அதேநேரம் டீ, காபியை தவிர்க்க முடியாமல் தவிக்கிறார்கள். அவர்கள் அனைவருக்குமான ஒரே மாற்று கிரீன் டீ. ஆம், ஆக்ஸிடைஸ் செய் யப்படாத தேயிலைகளில் இருந்து செய்யப்படும், கிரீன் டீ புத்துணர்ச்சியுடன் பல்வேறு மருத்துவக் குணங்களையும் கொண்டதாக இருக்கிறது.
தொடர்ந்து கிரீன் டீ குடித்து வரும்போது, இரத்த அழுத்த அளவுகள் தொடர்ந்து சீராகி வருகின்றன. ஆய்வுகளின்படி, ஒரு நாளைக்கு மூன்று முதல் நான்கு கப் கிரீன் டீ அருந்துவதால், ரத்த அழுத்தம் சீரடைகிறது. ஒரு ஆய்வின்படி, கிரீன் டீ அருந்துவதால் ஏற்படும் குறைந்த ரத்த அழுத்தம், இதய ரத்த நாள நோய்களின் அபாயத்தையும், பக்கவாதத்தின் அபாயத்தையும் குறைப்பதாகத் தெரிய வந்துள்ளது.
கிரீன் டீ இதய நோய்களுடன் நேரடியாகத் தொடர்புடைய கெட்ட கொலஸ்ட்ரால் அளவுகளையும் குறைக்கின்றது. அதே நேரத்தில் நல்ல கொலஸ்ட்ராலை பாதிப்பதில்லை. ரத்தத்தின் ஆன்டி ஆக்சிடெண்ட் அளவை அதிகரிப்பதன் மூலம், ரியாக்டிவ் ஆக்சிஜன் இதயத்தைச் சென்று சேர்வதைத் தடுத்து, மாரடைப்பு ஏற்படாமல் தடுக்கின்றன. ஒரு ஆய்வின் அடிப்படையில், கிரீன் டீ அருந்துபவர்களுக்கு, கார்டியோவாஸ்குலார் நோய்கள் ஏற்படுவதற்கு 31 சதவீதம் குறைந்த வாய்ப்பு உள்ளதாகக் கண்டறியப்பட்டுள்ளது. கிரீன் டீயில் உள்ள கேட்சின்கள் அத்திரோஸ்கெலரோசிஸ் அல்லது ரத்த நாளங்கள் இறுக்கமடைவதைத் தடுக்கின்றன, இப்படி இறுக்கமடைவதுதான் இதய நோய்களின் முக்கிய காரணமாகும்.
கிரீன் டீயானது உடலின் செல்கள் சர்க்கரையை இன்னும் சிறப்பாக செரிக்க வைக்க உதவுகிறது. இதனால் நீரிழிவு நோயைக் கட்டுக்குள் வைக்கவும் உதவுகின்றன. ஒரு ஆய்வின் அடிப்படையில், ஒரு நாளைக்கு ஆறு அல்லது அதற்கு மேற்பட்ட கப்கள் கிரீன் டீயைக் குடித்து வருவதால், டைப் 2 நீரிழிவு நோயின் அபாயம் 33 சதவீதம் வரை குறைவதாக தெரிவிக்கின்றனர்! இதனுடன், அமைலேஸ் என்சைம் ஸ்டார்ச்சை எளிய சர்க்கரையாக உடைக்க உதவுகின்றன; இந்த அமைலஸ் செயல்பாட்டைத் தணிப்பதன் மூலம், இரத்த சர்க்கரை அளவுகள் அதிகரிப்பதில் இருந்து கிரீன் டீ பாதுகாக்கிறது. மூளை செயல்பாட்டை மேம்படுத்தி, மூளையைப் பாதுகாக்கிறது
கிரீன் டீயின் முக்கிய உட்பொருளான கஃபீன், உங்களை விழிப்புடன் வைத்திருக்க உதவுவதோடு உங்களை புத்திசாலியாகவும் மாற்ற உதவுகிறது. காஃபியில் இருக்கும் அளவுக்கு அதிக அளவில் கிரீன் டீயில் கஃபீன் இல்லை என்றாலும், மிக அதிகமான காஃபி குடிக்கும்போது ஏற்படும் கிறுகிறுப்பு இல்லாமலே விழிப்புணர்வை ஏற்படுத்த கிரீன் டீ உதவுகிறது.
கிரீன் டீயில், எல்-தியனைன் என்கிற அமினோ அமிலமும் உள்ளது. இது கவலையைக் குறைக்கும் நியூரோ டிரான்ஸ்மிட்டரான காபா என்பதை அதிகரிக்கிறது. எல்-தியனைன் டோபமைனை அதிகரித்து, மூளையில் ஆல்ஃபா அலைகள் உருவாவதை அதிகரிக்கிறது. எல் தியனைன் மற்றும் கஃபீன் ஆகிய இரண்டுமே மூளையின் மேம்பட்ட செயல்திறனுக்கு உதவக்கூடிய பொருட்கள். கிரீன் டீ, ஒருவருக்கு வயதாகும் போது, நியூரான்களைப் பாதுகாப்பதன் மூலம் மூளையைப் பாதுகாக்கிறது, இதனால் அல்சைமர்கள், பார்கின்ஸன்கள் மற்றும் பிற நியூரோடி ஜெனரேட்டிவ் நோய்கள் ஏற்படும் அபாயத்தைக் குறைக்கும்.
கிரீன் டீயில் உள்ள பாலிஃபீனால்கள், குறிப்பாக கேட்சின்கள் என்பவை, புற்றுநோய் எதிர்ப்பு குணங்கள் கொண்டவை. நுரையீரல், சருமம், விதைப்பை, மார்பகம், குடல், கல்லீரல் மற்றும் கணையம் போன்றவற்றில் ஏற்படக் கூடிய புற்றுநோய்களுக்கு எதிராகவும் அவற்றில் குணமடைவதற்கு உதவுவதிலும் அதிக செயல்திறன் கொண்டதாக இருப்பதாகக் கண்டறியப்பட்டுள்ளது. ஆரோக்கியமான செல்களைப் பாதிக்காமல் புற்றுநோய் செல்களை அழிப்பதில் இந்த பாலி ஃபீனால் அதிக செயல்திறன் கொண்டுள்ளதாகத் தெரிய வந்துள்ளது. தினசரி நான்கு கப் கிரீன் டீ குடிப்பது, புற்றுநோய் சிகிச்சையில் உதவக் கூடியது.
வாயில் உள்ள முக்கியமான தீங்கு விளைவிக்கும் பாக்டீரியாக்களின் வளர்ச்சிகளைத் தடுப்பதில் கேட்சின்கள் திறனுள்ளவை என்று ஆய்வுகள் காட்டியுள்ளன. இந்த பாக்டீரியாக்கள், காறையை உருவாக்கி, பற்சிதைவு, சொத்தை போன்ற பிரச்சனைகளை ஏற்படுத்துகின்றன. கிரீன் டீ, வாயில் உள்ள பாக்டீரியாக்கள் சர்க்கரையை உண்பதைத் தடுக்கின்றன. மேலும் பற்சிதைவைத் தடுக்க உதவும் ஃப்ளூரைடும் இதில் உள்ளது. தொடர்ச்சியாக கிரீன் டீ குடித்து வருவதால், பல் நலன் அதிகரிக்கும், சுவாச துர்நாற்றம் குறையும்.
உலகம் முழுவதும், கிரீன் டீ அதன் எடை குறைப்பு பலன்களுக்காகப் புகழ் பெற்றுள்ளது. கிரீன் டீயில் உள்ள உட்பொருட்கள், எடை குறைப்பு செயல்முறைகளை ஊக்குவிக்கின்றன: – கொழுப்பு எரிவதையும், உடல் ஆற்றல் உற்பத்தியையும், அதாவது செரிமானத்தையும் கேட்சின் மேம்படுத்துகிறது. கேட்ச்சின் குடலில் கொழுப்பு அதிகமாக உட்கிரகிக்கப்படுவதைக் குறைக்கின்றன.
சருமத்திற்கும் ஏராளமான பலன்களைத் தரும் ஒரு சூப்பர்ஃபுட்டாக கிரீன் டீ இருக்கிறது, யுவி கதிர்களால் பாதிக்கப்பட்ட டிஎன்ஏ சிதைவால் உருவான முடியையும் சருமத்தையும் சரிசெய்ய உதவும். பருக்களுக்கு சிகிச்சை அளிக்கவும், ஆரோக்கியமான, மிருதுவான சருமத்தைப் பெறவும் கிரீன் டீ உதவும். – முடி கொட்டுவதைத் தடுக்கவும் உதவுகிறது. மன அழுத்தத்தைக் குறைத்து, அதனால் முடி கொட்டுவதையும் தடுக்கிறது.
இத்தனை நன்மைகள் இருக்கும் கிரீன் டீயை வேண்டாம்னு சொல்லலாமா?
