நீண்ட கால ஆரோக்கிய வழிகாட்டி
நம் உடல், வயதிற்கு ஏற்ப மாற்றமடையும். அதனால்தான் ஒரே வகையான உடற்பயிற்சி அனைத்து வயதினருக்கும் பொருந்துவதில்லை. வாழ்வின் ஒவ்வொரு நிலையை அடையும்போது, நீங்கள் செய்யும் உடற்பயிற்சியிலும் மாற்றங்களைக் கொண்டுவந்தால், அதற்குரிய சரியான பலனைப் பெறலாம். சரி, எந்த வயதில் எந்த மாதிரியான உடற்பயிற்சிகளை மேற்கொள்ளலாம் என்பது குறித்து காணலாம். இந்த வகையில் பயிற்சி மேற்கொள்பவர்களுக்கு 80 ஆண்டு வரையிலும் உடல் தளர்ச்சி அடையாமல் இருக்கும்.
15 வயது வரை
சிறுவர் சிறுமிகளுக்கு விருப்பமான விளையாட்டு எது, எந்த விளையாட்டில் அவர்களுக்கு தனித்துவம் தென்படுகிறது என்பதை அறிந்துகொள்ளும் வகையில் அனைத்து விளையாட்டுகளிலும் உடற்பயிற்சிகள் செய்வதிலும் ஈடுபடுத்த வேண்டும். எலும்புகள் உடல் தசைகள் விறுவிறுவென வளர்ச்சியடையும் பருவம் என்பதால் உடல் தசைகளை முறுக்கம் அல்லது இறுக்கம் அடைவதற்கான பயிற்சிகள் மட்டும் செய்யக்கூடாது.
16 – 19 வயது
இந்த வயதில் ஹார்மோன்களின் செயல்பாடு வேகமாக இருக்கும். எனவே, இந்த வயதில் ஆண் மற்றும் பெண் பிள்ளைகள் பளுதூக்கும் உடற்பயிற்சிகளை செய்வதற்குப் பதிலாக, நல்ல விளையாட்டுகளில் ஈடுபடலாம். அதனால், அவர்களின் உடல் நெகிழ்வுத்தன்மையுடன் இருக்கும். மேலும், விளையாட்டுகளில் ஈடுபடுவதால் தடகள திறன்கள் மேம்படுத்தப்பட்டு, நல்ல தடகள வீரராக ஆகும் வாய்ப்புள்ளது. ஏரோபிக் பயிற்சிகளில் ஆர்வம் காட்டும் பிள்ளைகளுக்கு இந்த வயதில் பயிற்சி ஆரம்பிப்பதே சரியாக இருக்கும்.
20 – 29 வயது
இந்த வயதில் தங்கள் தசைகளை வளர்க்கும் உடற்பயிற்சிகளை மேற்கொள்வது நல்லது. அதற்கு நல்ல உடற்பயிற்சிக் கூடத்தில் சேர்ந்து, பயிற்றுநர் பயற்றுவிக்கும்படி பின்பற்றி வர வேண்டும்.. மேலும், இந்த வயதில் விளையாட்டுகளில் ஈடுபடுவதைக் குறைத்து, தசைகளை வளர்க்க ஆரம்பிக்க வேண்டும். ஏனெனில், இதுதான் தசைளை வளர்ப்பதற்கான மற்றும் தசைகள் வளர்வதற்கான சிறந்த உரிய காலமும் வயதும் ஆகும்.
30 – 39 வயது
இந்த வயதில் தொப்பை வர ஆரம்பிப்பதோடு, டெஸ்டோஸ்டிரோனின் அளவு குறைய ஆரம்பிக்கும். எனவே, இந்த வயதில் ஒருநாள் விடாமல் வயிற்றுக்கும் கால்களுக்கும் உடற்பயிற்சிகளை மேற்கொள்வது நல்லது. இதனால் உடல் ஆரோக்கியம் சீராக பராமரிக்கப்படும்.
40 – 49 வயது
இந்த வயதில் தசைகளை கட்டுக்கோப்புடன் வைத்துக்கொள்வது சவாலான ஒன்று. எனவே, இந்த வயதில் எக்காரணம் கொண்டும் உடற்பயிற்சி செய்வதை நிறுத்தக்கூடாது. தினமும் சிறிது தூரம் நடத்தல், ஜாக்கிங், ரன்னிங் போன்றவற்றை மேற்கொள்ள வேண்டும்.
50 – 59 வயது
இந்த வயதில் சைக்கிளிங் செய்யலாம் . ஆனால், உங்கள் தசைகளின் அடர்த்தியைப் பராமரிக்க, வலிமையான உடற்பயிற்சிகளை மேற்கொள்ள வேண்டியது அவசியம். ஆனால், இந்த வயதில் பளுதூக்குவது அவசியம் இல்லை. அதிரடி விளையாட்டுகள் எதிலும் ஈடுபட வேண்டும். தினமும் யோகா செய்து வாருங்கள். இதுவும் அற்புதமான ஓர் உடற்பயிற்சியே.
60 வயதுக்கு மேல்…
இந்த வயதில் நீங்கள் இன்னும் வலிமையுடன் தரமான வாழ்க்கை வாழ்வதற்கு, இளமையில் நீங்கள் மேற்கொண்ட உடற்பயிற்சிகள்தான் காரணம். எனவே, இந்த வயதில் உடற்பயிற்சி செய்வதை நிறுத்தாமல், தினமும் ஏதாவது ஓர் உடற்பயிற்சியில் ஈடுபட வேண்டும். அதிலும் நீங்கள் உங்கள் தசைகளை வலிமையுடன் வைத்துக்கொள்ள நினைத்தால், முடிந்த அளவுக்கு நடை பயிற்சியும் யோகாவும் செய்யுங்கள். இதை, தவறாமல் பின்பற்றிவந்தால், வாழ்நாளின் அளவை நீட்டித்து ஆரோக்கியமாக வாழலாம்.
