ஞானகுரு :
ஆணின் ரத்தத்தில் பெண்ணை அடிமையாக்கும் வெறி இருக்கிறது. பெண்ணின் ரத்தத்தில் அன்பின் மூலம் ஆணை வளைத்துப்போடும் ஆர்வம் உண்டு. இருவரில் ஒருவர் ஜெயிக்கும் வரையிலும் அந்த வீடு ரணகளமாகவே இருக்கும். ஒருவரையொருவர் ஜெயிப்பதை விட ஒருவருக்கொருவர் விட்டுக்கொடுப்பதில் போராட்டம் நடந்தால் அந்த வீடு அமைதியாகிவிடும்.
விட்டுக்கொடுக்க முடியாமலும் ஜெயிக்க முடியாமல் போராடிக்கொண்டே வாழ்வது ஒரு வேதனையான காலகட்டம். எனவே, முதலில் போராட்டத்தை நிறுத்துங்கள். பூ விழுந்தாலும் தலை விழுந்தாலும் விளையாட்டு ஆரம்பிக்கவே செய்யும். எனவே, விளையாட்டில் மட்டும் கவனம் செலுத்துங்கள். ஆனால் நீங்கள் தோற்கவும் செய்யாமல் ஜெயிக்கவும் செய்யாமல் ஏழு வருடங்களாக போராடிக்கொண்டே இருக்கிறீர்கள். இனியும் வேண்டாம், இந்த போராட்டம். சரண் அடையுங்கள். ஒரு பெண்ணை சமாளிக்க முடியாத ஒருவரால் வேறு எந்த பெண்ணையும் சமாளிக்க முடியாது. எனவே, விவாகரத்து என்பது தீர்வல்ல.
மனைவியாக வந்தவருடன் போராடியே ஜெயிக்க முடியாதவரால், வயிற்றுப்பசியுடனும் சுற்றுச்சூழலுடனும் போராட முடியாது. எனவே, சாமியார் ஆசையைத் தூக்கி குப்பையில் போடுங்கள்.