பவுன்சிங் பால்
சின்ன வயதினருக்கு பந்தை பார்த்தாலே ஆனந்தமாக இருக்கும். பந்து கொண்டு பல்வேறு விளையாட்டுகள் இருந்தாலும், குழந்தைகளின் முதல் பந்து விளையாட்டு என்றால், அது துள்ளுபந்து என்றுதான் சொல்ல வேண்டும் இதை ‘ஜம்பிங் பால்’ என்றும் ‘பவுன்சிங் பால்’ என்றும் அழைக்கப்படுவது உண்டு.
வண்ணமயமாகவும், வினோத வடிவங்களுடனும் துள்ளிக் குதிக்கும் வேகத்தில் இந்தப் பந்துகள் சிறுவர்களை மட்டுமல்லாமல் எல்லோரையும் கவர்ந்துவிடும்.
துள்ளுபந்துகள் மற்ற பந்துகளைப்போல தோல் மற்றும் ரப்பர் மூலம் இடையில் காற்று நிரப்பி உருவாக்கப்படுவதில்லை. இவை, நவீன ரக பிளாஸ்டிக் மூலம் உருவாக்கப்படுகிறது. காற்று நிரப்பப்படாமலேயே இவை துள்ளிக்குதிக்கும் திறன்கொண்டவை. ஏனெனில், இவை அந்த அளவு மீள்தன்மை கொண்ட பிளாஸ்டிக் ஆகும். இவற்றின் பெயர் செக்ட்ரான் எனப்படும். வேறுசில பிளாஸ்டிக் கலவையிலும் இந்த வகை பந்துகள் தயாராகின்றன.
இதை உருவாக்கியவர் நார்மன் ஸ்டிங்லி. வாயில் போட்டு மெல்லும் சூயிங்கங்களை பந்துபோல உருட்டி விளையாடும் வழக்கம் பொதுமக்களிடம் இருந்தது. இதன் தாக்கத்தில்தான் துள்ளுபந்துகள் பிறந்ததாக கூறப்படுவது உண்டு. 1971ல் துள்ளுபந்தில் இசையை இணைத்து வெளியிட்டார்கள். அதாவது அந்த பந்தின் குறிப்பிட்ட பகுதியை தேய்க்கும்போது ஒருவகை இசையை கேட்க முடிந்தது. இந்த துள்ளு பந்துகளுக்கு ‘சூப்பர் பால்’ என்ற பெயரும் உண்டு. இந்த பெயருடைய நிறுவனம்தான் அதிக அளவில் துள்ளுபந்துகளை தயாரித்து விற்பனைக்கு கொண்டுவந்தது.
துள்ளு பந்துகளுக்கான பிளாஸ்டிக், மேற்கிந்திய ரப்பர் தாவரங்களில், மங்கோலிய பிளம் மரத்தை கலப்பினம் செய்து உருவாக்கப்பட்டதாக ஒரு தகவல் உண்டு. ஆனால், அதில் உண்மையில்லை. கோல்ப் பந்துகளின் உள்ளீடாக இருக்கும் பாலிபுடாடையின் போன்ற மீள்தன்மை கொண்ட பிளாஸ்டிக் வகைதான் செக்ட்ரான் ஆகும். துள்ளு பந்தினுள் ஒரு சதுர அங்குலத்தில் 1,200 பிஎஸ்ஐ அளவு அழுத்தம் இருப்பதே அவை ஆக்ரோஷத்துடன் துள்ளிக் குதிக்கக் காரணமாகும்.
துள்ளு பந்துகளை ஒருமுறை அழுத்தம் கொடுத்து குதிக்கவைத்தால் அது, சுமார் 12 முதல் 15 தடவை குதிக்கும். அதாவது, அத்தனை தடவை அவை சிறுசிறு துள்ளல்களை வெளிப்படுத்தும். ஏனெனில், அவை ஒவ்வொரு முறையும் 8 சதவீத அளவுக்கு ஆற்றலை இழந்துகொண்டே வரும். முதல்முறை ஒரு துள்ளு பந்து 1 மீட்டர் உயரம் எழும்பினால், அடுத்த முறை அது 92 சென்டி மீட்டர் உயரம் எழும்பும். அடுத்தமுறை மேலும் அதன் எழும்பும் வேகம் குறைந்துகொண்டே வந்து சுமார் 15 முறையில் அது தரையில் உருள ஆரம்பித்துவிடும்.
துள்ளு பந்துகள் இன்று 5 ரூபாய் மலிவு விலையில்கூட கிடைக்கிறது. ஆனால் அவை அறிமுகமான காலகட்டத்தில் சுமார் 100 டாலர் விலைவரை விற்றது. துள்ளு பந்துகள் மிக உயரத்தில் துள்ளிக் குதிப்பதால்தான் குழந்தைகளை அதிகளவில் ஈர்க்கின்றன.
துள்ளு பந்துகளின் வடிவமைப்பும் குழந்தைகளை ஈர்க்க முக்கியக் காரணமாகும். எல்லா வயது குழந்தைகளையும் துள்ளு பந்துகள் மகிழ்விக்கும் என்றாலும், 3 வயதுக்கு குறைவான குழந்தைகளிடம் துள்ளு பந்துகளை விளையாடக் கொடுக்க வேண்டாம் என அறிவுறுத்தப்படுகிறது. அந்த வயதுக் குழந்தைகள் எல்லாப் பொருட்களையும் வாயில் வைத்து விளையாடுவதை வாடிக்கையாக வைத்திருப்பார்கள். துள்ளு பந்துகள் ஈர்ப்புடைய வண்ணங்களில் இருப்பதும், மென்மையான திறனுடன் இருப்பதுவும் குழந்தைகளை வாயில் வைத்து சுவைப்பதையும், கடிக்கும் ஆர்வத்தையும் தூண்டலாம். ஆனால் அது ஆபத்தானது என்பதால் துள்ளு பந்துகளை வாயில் வைத்து விளையாடக்கூடாது.
குழந்தைகள் பந்துகளுடன் விளையாடுவதால் பல்வேறு திறன்களை வளர்த்துக் கொள்கிறார்கள் என்கிறது ஆராய்ச்சி முடிவுகள். பந்துகளின் பின்னால் ஓடுவதால் அவர்களின் இயக்க ஆற்றல் அதிகரிக்கிறது. வண்ணம் அறிதல், வடிவம் அறிதல், இணைந்து விளையாடும் திறன் உள்ளிட்ட பல்வேறு திறன்கள் வளர்கின்றன. துள்ளுபந்துகள் மற்ற பந்துகளைவிட அதிக உந்துசக்தி கொண்டவை என்பதால் அவை மற்ற பந்துகளைவிட அதிகமாகவே குழந்தைகளுக்கு ஊக்கசக்தியை அதிகரித்து திறமைகளையும் வளர்க்கிறது என்று நம்பலாம்.
